ORANJESTAD – Servicio di Aduana kier pone na conocimiento na tur esnan cu ta viaha pa exterior y cu probablemente a haci compras di articulonan di uso personal of pa negoshi pa nan tene cuenta na nan yegada pa ora nan declara nan mercancia na Servicio di Aduana pa nan haci esaki debidamente.
Pa e articulonan di uso personal cu cada pasahero (riba 16 anja) tin derecho ariba te cu un balor di 400,- florin, Servicio di Aduana lo desconta e 400,- florin, solamente si e recibo di compra wordo mustra na Servicio di Aduana. Tene cuenta si cu e exoneracion di 400,- florin no ta conta pa mercania comercial.

Un aviso ta bai na e pasaheronan cu tin un suma di mas cu 20.000,00 (20 mil) florin tin cu declara e suma na momento di yegada of salida. Formularionan pa declara esaki ta obtenibel na cada oficina di e entradanan di Pais Aruba.

E deber di e pasahero ta pa duna Servicio di Aduana e informacion corecto di e montante di placa ariba menciona y e mercancia lokual nan tin den nan poder. Si e viahero no cumpli cu esaki, esaki tin como consequencia cu e viahero lo tin cu paga e derechonan di importacion y lo haya multa y/o wordo deteni.
 

GERENCIA DI SERVICIO DI ADUANA
6 april 2010