ORANJESTAD – Servicio di Aduana ta informa tur su clientenan cu en coneccion cu eficiencia di nan servicio, entrante 19 di april proximo e ofisinanan di e seccion di Servicio di Aduana San Nicolas lo bai ta habri for di dialuna pa diabierna for di 07.30 di mainta te cu 4.30 di atardi. Si e cliente tin un urgencia pa vrijmaking di containers riba diasabra, mester haci peticion pa cu esaki tempran durante oranan di trabou na e Hefe di dicho seccion. Cuminsando 17 di april proximo lo no tin Servicio di Aduana mas den weekend na seccion San Nicolas.

Tur peticionan pa “gatepass” di Valero durante oranan di trabou lo bai cai bou di encargo di seccion di Servicio di Aduana na San Nicolas.

Tambe Servicio di Aduana ta pidi e agencianan di barco cu ta haci entrada y salida di barco pa “Valero Refinery Aruba”, entrante 17 di april proximo tur entrada di y salida di barco, peticion pa verhaalvergunning etc. lo bai cai bou di encargo di e seccion di Servicio di Aduana di Waf.

Servicio di Aduana ta pidi tur cliente pa tuma bon nota di e aviso pa evita inconvenencia pa cu esaki.

Pa mas informacion por tuma contacto cu sra. Patricia Flanders-Illis, Hefe di seccion Servicio di Aduana  San Nicolas, telefon 5845314, 5845319.

GERENCIA DI SERVICIO DI ADUANA
30 MAART 2010