ORANJESTAD – Servicio di Aduana kier informa tur broker y importador di carga cu entrante 31 di mei proximo Servicio di Aduana lo reanuda scanmento di container y mercancia cu ta drenta y sali for di Aruba. Ta asina cu poco despues di a cuminsa cu e proceso di scanmento di container, e machine a haya daño y a dura algun luna prome cu por a pone esaki bek den funcion.

Mirando cu lo reanuda scanmento di container, Servicio di Aduana kier recorda tur broker y/of importador di carga cu tur procedura existente manera seyamento y registracion di parti di Astec y Servicio di Aduana na porta di salida y entrada di waf, lo keda na vigor.

Pa e proceso di scanmento cana mas eficiente posibel, e broker of importador di carga mester entrega e 'bill of lading' of manifiesto di e mercancia cu tin den e container, na Servicio di Aduana na inicio di e proceso di scan.

GERENCIA DI SERVICIO DI ADUANA
25 mei 2010