Oranjestad – Servicio di Aduana ta participa cu a bin cambio di ley encuanto e declaracion obligatorio di transportacion di placa na yegada of salida di Aruba. E cambio di ley ta encera cu ta amplia e obligacion di haci declaracion.

Te cu dia 30 di juni 2010 ta asina, cu den caso cu un persona ta drenta of sali di Aruba y ta transportando mas cu Afl. 20.000,- na placa cash, e tin e obligacion di haci declaracion di esaki na Servicio di Aduana.
Entrante 1 di juli 2010 ta conta cu no solamente ta obligatorio pa declara placa cash, sino tambe otro medionan monetario na balor di mas cu Afl. 20.000,-. Aki ta trata di papelnan negociabel di balor cu ta representa placa efectivo y cu tur persona por uza. Por ehempel: check, accionnan na portador y 'giftcard' prepaga. Tarheta di credito of ATM no ta cay bou e obligacion aki debi cu solamente e doño ta autorisa pa uza esakinan.

E persona cu ta transportando placa cash of otro medio monetario mester entrega su declaracion na e duanero presente na aeropuerto, waf of postkantoor.

GERENCIA DI SERVICIO DI ADUANA
15 di juli 2010