ORANJESTAD – Servicio di Aduana kier pone na conocemento di tur esnan cu ta biahando pa exterior y cu probablemente ta bay haci compras di articulonan pa uzo personal of negoshi, pa tene cuenta cu na yegada na Aruba tin cu declara e mercancia debidamente na duana.

Tambe Servicio di Aduana kier alerta tur biahero/importador of exportador di carga cu ta importante pa ta conciente di e reglanan prescribi den diferente ley encuanto importacion of exportacion di mercancia of transportacion di mercancia for di Aruba cu ta rekeri un permiso y/of cu ta prohibi.
Pa menciona algun mercancia por pensa riba arma (di candela), droga, remedi, mata, bestia, carni of preparacionnan traha di carni procedente di Sur y/of Centro America etc.

Si e biahero/importador of exportador di carga no por presenta un permiso, Servicio di Aduana lo wanta e mercancia y esaki lo por tin como consecuencia cu e biahero/importador of exportador di carga ta haya multa y/of ta wordo deteni. Alabes lo destrui e mercancia despues.

Servicio di Aduana ta haci un suplica na un y tur pa tuma bon nota di e aviso aki p'asina evita cualkier inconveniencia cu por surgi durante control di duana.

GERENCIA DI SERVICIO DI ADUANA
16 juli 2010