Su ofisinanan lo bai ta sera dia 26 di januari proximo parti mainta y lo habri bek pa 1’or di merdia

ORANJESTAD – Servicio di Aduana ta cla cu nan preparacion pa celebra “Dia Internacional di Douane 2011” cu sa wordo celebra tur aña dia 26 di januari. E fecha aki ta wordo conmemora dor di e Departamentonan di Douane rond Mundo, debi cu riba 26 di januari na aña 1953 e miembronan di e Customs Corporation Council (CCC) cu ta conoci awor como “World Customs Organisation” (WCO) a reuni oficialmente pa di prome biaha na Brussel.
Pa conmemora y festeha e dia Internacional menciona, Servicio di douane a organisa diferente aktividad riba e dianan 22, 23, 24 y 26 di januari proximo.

E programma ta como lo sigieunte:
Dia 22 di januari, lo bai tin Seso sport na Club Dosva na Dakota cuminsando for di 7or di anochi sigui cu un fiesta bailable te cu 2’or di mardruga;
Dia 23 di januari un “softbal toernooi” a wordo organisa na veld di Kudawecha cu lo cuminsa for di 10or di mainta;
Dia 24 di januari ta bai tin for di 6or di atardi e evenemento “Mens erger je niet” y un competencia di Domino sigui cu un fiesta bailable te cu 2’or di mardruga na Centro di Bario Brazil.
Dia 26 di januari, for di 08.30’or di mainta lo bai tin un Santo Sacrificio di Misa cu lo tuma lugar na Iglesia Santa Anna na Noord.

Pueblo en general ta keda cordialmente invita pa asisti na e evenementonan menciona riba 22, 23, 24 y 26 di januari proximo. Na tur e evenementonan lo bai tin bon animacion cu musica acompaña cu un bar y cushina bon surti.
Bini uno bini tur!

Servicio di Aduana kier recorda tur su clientenan cu en conexion cu e celebracion aki, su ofisinanan lo bai ta sera dia 26 di januari proximo parti mainta y lo habri bek pa 1’or di merdia.

 

GERENCIA DI SERVICIO DI ADUANA
21 di januari 2011