Entrante awe, 9 di mei, Servicio di Aduana ta introduci e sistema automatisa nobo. Pareu cu esaki Servicio di Aduana ta aplica tambe un sistema di codigo di mercancia cual ta wordo uza internacionalmente cu yama Sistema Harmonisa (het Geharmoniseerd Systeem of GS)

ORANJESTAD – Entrante awe, 9 di mei, Servicio di Aduana ta introduci e sistema automatisa nobo. Pareu cu esaki Servicio di Aduana ta aplica tambe un sistema di codigo di mercancia cual ta wordo uza internacionalmente cu yama Sistema Harmonisa (het Geharmoniseerd Systeem of GS). Desde maart ultimo Servicio di Aduana ta dunando su clientenan informacion relaciona cu e cambionan aki pa asina nan no haya contratempo ora di haci declaracion locual por stroba e cliente di haya su mercancia na tempo.

Declaracion cu codigo di Sistema Harmonisa
Tur mercancia cu ta wordu importa, exporta of transporta via Aruba mester wordo declara pa medio di e declaracion yama “Enig document”. Locual e cliente mester corda ta cu cierto parti di e “Enig document” awor ta obligatorio pa yena. Banda di esaki e cliente mester uza e codigo nobo di mercancia di Sistema Harmonisa. E sistema automatisa nobo conoce solamente e codigonan di Sistema Harmonisa. Ta importante pa e cliente yena e declaracion completamente y corectamente pa esaki por wordo registra y procesa door di e sistema automatisa nobo. Si acaso e declaracion no ta yena completamente, e tin fout of e ta menciona e codigonan bieu, Servicio di Aduana no lo procesa e decalaracion. Den un caso asina Servicio di Aduana lo avisa e cliente pa asina e cliente mes corigi esaki.

Number di registro
Un otro aspecto cu ta hopi importante ta, pa e cliente declara su number di registro (persoonsnummer). Sin e number di registro Servicio di Aduana no por procesa e declaracion. Si e cliente ta laga un representante (broker) haci declaracion pe, e ora e representante tambe mester yena su number di registro. Si acaso un cliente no tin su number di registro e por verifica esaki cu Servicio di Impuesto na telefon 583-9398 of manda un fax na 583-7147.

Final di proceso
E sistema automatisa nobo lo registra e informacion di cada declaracion y calcula automaticamente e derecho di importacion (invoerrechten) y derecho di consumo (accijnzen). E cliente ta responsabel pa e contenido di e declaracion y e debe cu por surgi. Ora e declaracion ta completamente procesa e cliente por haci su pago pa cual e cliente lo ricibi un recibo embes di un imprenta di caha riba e Enig document. Despues di esaki e cliente por pidi Servicio di Aduana pa controla e carga conhuntamente cu e Enig Document. Si tur informacion riba e declaracion ta cuadra cu e mercancia declara, Servicio di Aduana lo laga e mercancia liber na desponibilidad di e cliente.

Pa informacion
Pa mas informacion e cliente di Servicio di Aduana por yama na telefon 5882724 ext. 274, 266, of 267. of manda un e-mail na gsinfo@siad.aw.
Tambe por consulta e website: www.siad.aw seccion di duana. Riba e website aki e clientenan por haya tambe Sistema Harmonisa (GS) y e aclaracion di Enig Document (toelichting).
Servicio di Aduana ta pidi tur su clientenan pa nan ta bon informa pa evita posibel inconvenencia relaciona cu mercancia.

GERENCIA DI SERVICIO DI ADUANA
8 mei 2008