ORANJESTAD – Diabierna ultimo, dia 24 di april 2009, a tuma lugar e entregamento di diploma pa e rango di “Hoofdkommies der Invoerrechten en Accijnzen” (I&A) na Servicio di Aduana.
E opleiding di Hoofdkommies der I&A a inicia na januari 2006 y e ta un opleiding cu tabata tin un duracion di dos aña. Diabierne ultimo dicho opleiding a finalisa oficialmente y un grupo di 19 cursista a logra termina esaki exitosamente. E opleiding tin como meta pa prepara e duaneronan riba e diferente legislacionan cu nan ta traha cu’ne y riba un nivel avansa. E diferente ordenanzanan ta basa riba e tareanan fiscal y no fiscal di douane cu ta e.o e control riba e im- exportacion di carga cu ta destina pa Aruba of cu ta wordo transporta via Aruba pa otro paisnan.
E personanan cu a gradua ta sra. Helene H.I.H Arends, sr. Juan A. Geerman, sra Shaymara C. Sanchez, sra. Natalie L. Blijden-Pablo, sra. Berrill N. L. Canwood, sra. Wilfrida E. Croes, sra. Marushca S. Leest, sra. Tyrina I. Wernet-Thijzen, sra. Siera A. Winterdaal, sra. Yamila Z. Luidens, sr. Kendrick H. Giel, sr. Gilbert E. Maduro, sr. Eduardo G. Boekhoudt, sr. Javier C.J Ras, sr. Jeffrey F. R. Schuilenburg, sr. Randolph M. Kock, sr. Marlon G.F Tromp, sr. Maria C.A. Vrolijk y sr. Giovanni M. Davelaar. E tres cursista cu a slaag mihor ta sra. Helene Arends, sr. Juan Geerman y sra. Shaymara Sanchez.
Gerencia di Aduana kier a gradici tur esnan cu a traha hunto pa e opleiding di Hoofdkommies der I&A por ta posibel. Na prome lugar nos kier a gradici e Minister di Finansas y Asunto di Economia, sr. N. Swaen, bac., kende a duna su aprobacion pa cuminsa e opleiding aki. Sr. Swaen no tabata por ta presente, pero a percura pa manda su felicitaciones pa tur e graduadonan. Un danki tambe ta bai pa e Directora di Servicio di Impuesto y Aduana (SIAD), sra. mr. Ritza R. Lopez- Hernandez kende semper a para positivo tras di e opleiding nan interno di Servicio di Impuesto y di Aduana p’asina e empleadonan por sigui crece den nan funcion.
Durante e ceremonia, hefe di e estudio esta, sra. Patricia Flanders-Illis a gradici tur esnan cu tabata encarga cu e organisacion di e opleiding aki. Un danki a bai na sra. Eefje van Leur-Noten, secretaria di e opleiding cu haci un tremendo trabou, sr. Haime Feliciana cu ta e funcionario encarga cu asunto di personal di Douane, tambe na sr. Marcelito Pablo y sra. Lise-Marie Vandormael-Moons cu a duna nan aporte na e realisacion di e opleidng aki.
Un gradicimiento a bai muy especial na tur e docentenan cu a sa di duna nan dedicacion y contribushon pa e opleiding aki por tabata posibel y ta spera cu den futuro Servicio di douane por keda conta hopi biaha mas cu nan aporte. Por ultimo un pabien a bai na tur e graduadonan kendenan a lucha y a sakrifika pa yega e final di e opleiding menciona.
Den un ambiente ameno tur e graduadonan a risibi nan diploma for di e Directora di SIAD, sra. mr. Ritza Lopez-Hernandez en presencia di e hefenan di Cuerpo di Aduana esta sr. mr. Wiebe Pera y sra. mr. Corinne Cabenda.
 
GERENCIA DI SERVICIO DI ADUANA, 27 april 2009