ORANJESTAD – Entrante 22 di september proximo Servicio di Aduana lo cuminsa scan container y tur otro sorto di mercancia cu ta drenta y sali for di Aruba. E machine di scan ta un tipo mobil cu por move tur rond di nos isla.
Cu e machine di scan aki Servicio di Aduana lo por controla si mercancia ta bay drenta ilegal of mercancia cu ta prohibi. Servicio di Aduana lo traha estrechamente cu doño di e companianan di truck cu ta move container (hauliers), Astec y APA pa logra cu esaki y duana lo selecta e containernan cu lo mester wordo gescan.

Tur 'Custom broker' y doño di mercancia lo wordo informa adelanta si su container of carga lo wordo gescan. E tereno principal na unda e containernan lo wordo gescan ta situa den tereno di Zona Liber na Playa, cerca di porta di entrada y salida di waf. Esaki lo bay ta temporario.
Na e tereno di scan tur chauffeur di truck lo mester entrega un 'bill of lading' of manifiesto di e mercancia cu tin den e container na e duanero promer cu cuminsa e proceso di scan. Tur procedura existente manera seyamento y registracion di parti di Astec y Servicio di Aduana lo keda mescos na porta di salida y entrada di waf.  

Pa mas informacion por tuma contacto cu Servicio di Aduana na telefon 583 1286 of 582 9706.

GERENCIA DI SERVICIO DI ADUANA
18 di september 2009