ORANJESTAD – Dia 21 di september ultimo, Servicio di Aduana a celebra e inauguracion di e scanner di container mobil. A tene un “soft opening” riba tereno di zona liber na Playa pa cu introduccion di e scanner aki.
Durante e ceremonia, Hefe di Servicio di Aduana, sra. mr. Corinne Cabenda, a elabora riba uzo di e scanner y a enfatisa cu e ta un logro enorme pa Servicio di Aduana.

Minister di Finansas y Asunto Economico, sr. Nilo J. Swaen, tabata e persona clave tras di e proyecto aki y a duna su bon cooperacion pa cu esaki. El a percura pa haya e financiamento necesario di Fondo di Desaroyo Arubano (FDA) pa compra di e scanner.

Sra. Cabenda a duna di conoce cu e tabata un proyecto grandi y ta contribui na e seguridad di e comunidad Arubano. Cu ayudo di e scanner aki, Servicio di Aduana lo eherce su control mucho mas eficiente pa asina combati criminalidad. Por ehempel controla si mercancia ilegal of prohibi ta drenta of sali for di Aruba. Alabes despues di scanmento di container, Servicio di Aduana lo tin mas confiansa pa hasta laga un container bay su destinacion local sin e control fisico di un duanero.

Hefe di Servicio di Aduana, sra. mr. Corinne Cabenda, a gradici Minister di Finansas y Asunto Economico, sr. Nilo J. Swaen, Director di SIAD, sra. mr. Ritza Lopez-Hernandez, presidente di Fondo di Desaroyo Arubano, sr. Gerard Oduber, gerencia di Freezone NV, ex-hefe di Servicio di Aduana, sr. Wiebe Pera, funcionario di Servicio di Aduana, sr. Ronnie Angela, kende tambe a duna su contribucion inmenso pa por realisa e proyecto aki, director di APA, sr. Alfonso Boekhoudt y sr. Seraus di Astec pa nan bon cooperacion pa cu e proyecto aki. Tambe un danki ta bay na tur e hefenan di Servicio di Aduana, e coleganan y otro invitadonan cu a asisti na e ceremonia.

Gerencia di Servicio di Aduana
23 di september 2009