ORANJESTAD – Servicio di Aduana ta sigui cu su campaña pa asina promove e seccion di duana na San Nicolas. E motibo di e campaña aki ta pa stimula e brokernan y importadornan di carga, principalmente e comerciantenan y e habitantenan di pariba di brug cu nan por haci uzo di e servicionan cu ta entre otro e procesamento di declaracion, informacion encuanto e rikisitonan pa cu e importacion y exportacion di carga, "vrijmaking" di container, pago di derecho di importacion y di consumo, etc.

Actualmente casi tur broker y importador di carga ta haci uzo di e servicionan cu e “aangiftekantoor” na Playa ta brinda. Mirando e cantidad di declaracion cu ta wordo entrega y procesa diariamente na Playa, principalmente durante e temporadanan druk, ta pone cu e tempo di espera di registracion di declaracion lo por dura mas cu normal.
Si algun broker of importador di carga entrega nan declaracionnan na e seccion di San Nicolas, esaki sigur lo alivia e peso di e seccion di Playa.
Servicio di Aduana kier brinda un servicio mas eficiente. Trahando den e forma aki e wardamento pa procesa e declaracion lo bira menos y e ora ey e cliente lo por ricibi su carga mucho mas liher.

E declaracionnan cu no ta wordo procesa na e seccion di San Nicolas ta e declaracionnan cu ta regarda carga transporta cu avion (LV01) y e declaracionnan cu ta regarda carga di Zona Liber (VZ01).

Servicio di Aduana kier recorda tur cliente cu ta necesario pa e declaracionnan ta corectamente yena y tur e documentonan cu ta regarda e declaracion mester ta na ordo pa asina e proceso por cana mas eficiente cu ta posibel.

E oficina di Servicio di Aduana seccion San Nicolas ta ubica na B. v/d Veen Zeppenveldtstraat # 7, ex-edificio di Uncle Louis Store, telefon 584-4300, fax 584-5309.

 

GERENCIA DI SERVICIO DI ADUANA
5 di januari 2010