Douane ta recorda comerciantenan con pa calcula balor di mercancia cu ta wordo importa

Douane ta recorda comerciantenan con pa calcula balor di mercancia cu ta wordo importa

A base di diferente reaccion y pregunta for di comercio, Departamento di Aduana ta informa su clientenan encuanto e calculacion di balor di mercancia, e asina jama douanewaarde.

Na aña 2012 douane a recorda comerciante mediante un articulo den Prensa riba algun detayes cu kier ser mira riba facturanan cu ta ser entrega na Douane.

Brokers, comerciantenan y importadornan tin di tene cuenta cu e siguiente 4 puntonan cu ta di suma importancia pa e calculacion di douanewaarde :

1. Condicionan cu ta mara na e entregamento di mercancia cu ta por ehempel CIF, CIP, CF, CFR, CPT, DDP, DDU, DES, DEQ etc. ta gastonan cu ta core riba cuenta di e bendedor. Si acaso un di condicionan menciona ta poni riba un factura e ora e bendedor mester specifika e gastonan  riba e factura.

  1. No ta acepta descuento riba gastonan di transportacion, ni transportacion gratis. E gastonan di transportacion den e dos casonan aki lo wordo calcula door di usa tarifanan usuario di rutanan similar. Esaki ta conta pa seguro di e mercancia tambe, Douane lo calcula 1,5% pa seguro si no presenta un seguro.
  2. No ta desconta gastonan di “Aruba Landing of Terminal Handling Charges (THC destination)” si e no ta specifica riba e Bill of Lading.
  3. Palabracionan no acepta pa douane den documentonan di transportacion of facturanan comercial ta: “sales orders”, “MEMO”, “quotation”, “order confirmation” “as agree”. Esaki ta conta tambe pa facturanan comercial cu tin e palabranan: “this is not a bill”, “do not pay this amount”, “value for customs only”.

Documentonan cu ta incorrecto of incompleto lo wordo poni “on hold”, alabes e cliente lo wordo poni na altura cu falta documentacion of documentonan ta incorrecto pa asina e cliente entrega e documentonan concerni. Den caso cu clientenan no entrega e documentacion apropia tin consecuencia cu e carga ta keda stagna te na momento cu e documentonan apropia wordo entrega pa asina douane por hasi su verficacion y release e carga segun ley di douane.

Un biaha mas Departamento di Aduana ta hasi un suplica na tur cliente pa tene cuenta cu e 4 puntonan ariba menciona en conexion cu e calculacion di e balor di douane pa evita cu e proceso di release carga wordo stagna innecesariamente cu tur consecuencianan indesea cu ta bin na momento cu e trabou di verificacion di aangifte sosode.

Departamento di Aduana ta gradici tur su clientenan cu ta tene cuenta cu e douanewaarde y si tin cualkier pregunta of duda con pa calcula esaki, por bishita nos website www.douane.aw tambe por tuma contacto libremente via telefon: 5238888 of email nos na: info@douane.aw.

 

More news