Departamento di Aduana ta sigui registra articulo prome cu biaha

Departamento di Aduana ta recorda publico en general cu ta sigui cu e proceso di registración di articulo personal electrónico manera laptop, Tablet y celular prome cu biaha.

Departamento di Aduana ta splika cu den ley ta stipula cu tur articulo cu jega Aruba mester paga derecho. Pero tin excepcion riba e ley aki. Pa evita discusión entre e biahero y Aduana na jegada na Aruba, Departamento di Aduana ta facilita e proceso aki pa medio di e formulario di registración.
Den caso cu por tin duda riba e articulo Aduana por pidi e biahero na jegada pa un comprobante (schriftelijke bewijs) cu e tabatin e articulo aki prome cu e la sali for di Aruba. Di experiencia Aduana sa cu hopi hende no ta warda of cana cu factura di su articulonan. Pa e motibo aki Departamento di Aduana ta ofrece e formulario di registracion aki pa facilita e biahero pa ora e jega Aruba back e no encontra su mes cu friccion cu Aduana.

Departamento di Aduana ta sigui tuma registracion na oficina di Aduana tanto na Aeropuerto y na Aerocargo. E pasahero por download e formulario di registracion riba e website www.douane.aw, e ta yena esaki y ta trece e articulo personalmente na e oficina di Aduana na aeropuerto of aerocargo pa e haña un validez. Pa e registracion di e articulona ariba menciona Departamento di Aduana no tin niun gasto envolvi, como cu esaki ta un facilitacion pa e biaheronan.

más noticias