Temporada di vakantie ta den porta y hopi di nos hendenan local ta preparando pa bay cu vakantie pronto of ta preparando pa ricibi famia y sernan keri for di exterior. Departamento di Aduana den su tarea Non-Fiscal ta encontra su mes hopi biaha cu personanan cu ta regresa Aruba cu productonan, mascota of mata cu tin mester di un permiso di importacion. Den caso aki Departamento di Aduana manera e autoridad cu ta controla y supervisa tur locual ta drenta of sali for di Aruba tin un “stop functie”. Esaki kiermen cu Aduana ta controla si tur locual drenta of sali for di nos país ta cumpli cu VGEM. Den cuadro di e tareanan VGEM Aduana ta estricto cu e siguiente articulonan cu ta drenta nos pais.

Productonan cu ta prohibi pa importa of cu mester di un permiso di importacion

Biaheronan mester ta conciente di e reglanan prescribi den diferente ley encuanto importacion of exportacion di mercancia of transportacion di mercancia for di Aruba cu ta rekeri un permiso y/of cu ta prohibi. Ehempel di mercancianan prohibi ta carni of preparacionnan traha di carni y droga.

Departamento di Aduana ta indica cu ta necesario pa informa tur e personanan cu ta biaha pa e paisnan den e region di Sur-of Central America (Venezuela, Colombia etc) pa tene cuenta cu e reglanan cu tin prescribi den e ley yama “Slacht en Keuringsverordening”. Den e ley menciona ta estrictamente prohibi pa importa carni of preparacionnan traha di carni manera “chorizo” cu ta bini for di Sur – y Central America ta prohibi pa drenta Aruba. Si tin personanan cu ta bini for di un pais di Sur- of Central America y ta trece e tipo di mercancia aki cune esaki tin como consequencia cu Departamenti di Aduana lo kita e mercancia y despues entrega esaki na Vetenaire Dienst cu lo destrui e mercancia aki.

Tin caso caminda personanan cu ta biaha y ta bolbe Aruba bek cu productonan cu mester di un permiso di importacion manera:

• Carni of productonan di carni
• Planta
• Remedi
• Aparatonan di telecommunicacion
• Animalnan
• Arma (di candela)
• Pesticida
• Productonan y substancianan kimiko

Entrepot y permiso di importacion

Den caso cu un biahero no por presenta e documentacion necesario pa cu e productonan ariba menciona e productonan aki lo wordo warda temporalmente den e entrepot di Departamento di Aduana te na momento cu e biahero por presenta cu domentonan, facturanan y permiso pa por importa e productonan aki. Pa cada dia cu e producto keda warda den entrepot lo cobra un tarifa “chikito”. Pa es motibo aki ta hopi importante pa e biahero por regel tur e permisonan necesario prome cu e biaha pa asina ora e yega Aruba bek e no experiencia inconveniencia.

Esaki ta conta tambe pa remedinan cumpra den exterior y pa cual ta conta cu mester di un permiso di importacion di Inspectie Geneesmiddelen. Departamento di Aduana lo “toets” si esaki tin derecho riba exoneracion di impuesto of mester paga impuesto.

Departamento di Aduana ta spera cu tur persona preparando pa biaha por tene cuenta cu e informacion aki pa asina por goza di un vakantie sin preocupacion. Tambe cu e yegada na Aruba den territorio Aduanero por bay mas suave posibel sin algun inconveniencia.

De caso cu tin cualkier pregunta encuanto e trabounan of rekisitonan di Aduana cu tin di haber cu e momento di sali for di Aruba manera e rekisitonan na momento di yega Aruba bek, por bishita nos website www.douane.aw of por tuma contacto via nos emailadres: info@douane.aw of yama nos na telefon 523-8888.