Control di Aduana na aeropuerto durante temporada di fin di aña

Departamento di Aduana kier recorda tur persona biahando pa exterior durante temporada di fin di aña y cu lo bai hasi compras di articulonan pa uso personal of negoshi pa tene cuenta cu na yegada na Aruba tin cu declara e mercancia debidamente na Aduana. Pa productonan di uso personal te cu un balor di factura di 400 florin ta posibel pa importa esakinan sin cu ta necesario pa paga impuesto di importacion. Articulonan cu ta wordo importa y cu tin un valor di factura cu a surpasa 400 florin lo mester paga derecho ariba e producto completo. Corda cu articulonan pa uso comercial no ta bin na remarke pa cu e exoneracion aki.

Formulier Tijdelijke Uitvoer

Departamento di Aduana ta recomenda biaheronan pa registra articulonan manera laptop of tablet na oficina di Aduana na Aerocargo of na Aeropuerto. Esaki ta conta solamente pa articulonan di balor cu ta practicamente nobo y cu e biahero no tin un comprobante cu e producto a wordo cumpra aki na Aruba of cu a yega di cumpre den exterior y cu e derecho di importacion ya ta paga. E formulario ta un comprobante cu e persona a sali cu e articulonan for di Aruba y e ta pa evita cu mester paga impuesto ariba e articulo aki na momento cu e regresa bek Aruba. Tur biahero por download e formulario di Tijdelijke Uitvoer for di riba e website www.douane.aw y jena e formulario di adelanta pero lo mester pasa registra esaki promer cu e biaha na oficina di Aduana na aeropuerto of na e seccion di Cargo.

Prohibicion pa importa carni of productonan di carni

Na mesun momento Departamento di Aduana ta haya cu e ta necesario pa informa tur e personanan cu ta biaha pa e paisnan den e region di Sur-of Central America (Venezuela, Colombia etc) pa nan tene cuenta cu e reglanan cu tin prescribi den e Ley yama “Slacht en Keuringsverordening”.

Den e Ley menciona ta estrictamente prohibi pa importa carni of preparacionnan traha di carni manera “Ayaka of Pan de Jamon” cu ta bini for di Sur – y Central America ta prohibi pa drenta Aruba. Si tin personanan cu ta bini for di un pais di Sur- of Central America y ta trece e tipo di mercancia aki cu’ne esaki tin como consequencia cu Departamenti di Aduana lo kita e mercancia y despues entrega esaki na Vetenaire Dienst cu lo destrui e mercancia aki.

Biaheronan y importadornan (di carga) mester ta conciente di e reglanan prescribi den diferente ley encuanto importacion of exportacion di mercancia of transportacion di mercancia cu ta rekeri un permiso y/of cu ta prohibi. Ehempel di mercancianan prohibi ta carni of preparacionnan traha di carni (ayaka, pan de jamon, ham) di e Paisnan den Sur- of Central Amerika. Tambe corda riba productonan manera droga, remedi, mata, bestia y armanan (di candela). Den caso cu e biahero/ importador of exportador di carga no por presenta un permiso, Departamento di Aduana lo wanta e mercancia y esaki lo por tin como consecuencia cu e persona ta haya un multa y/of lo por wordo deteni. Alabes e mercancia lo por wordo destrui.

Meer nieuws