Departamento di Aduana a tene reunion cu CUA y ATIA pa loke ta e cambio riba maneho di descuento riba factura

Diahuebs 1 september 2022 Departamento di Aduana a tene un reunion cu Comerciantenan Uni Aruba (CUA) y Aruba Trade & Industry Association (ATIA) riba e tema di Douanewaarde. E intencion di reunion aki tabata pa sinta hunto cu e gremionan pa duna un aclareacion riba e maneho di descuento riba factura di productonan cu ta wordo importa.

Durante e reunion, Douana su expertonan riba e area di waarde a splica cu practica tin diferente descuento cu Douana ta acepta y tin algun cu Douana no ta acepta. Esaki ta trece cu si riba un factura tin un rebaho di prijs cu no tin ningun specificacion, p.e. ta para ‘discount’, Douana no tabata acepta e rebaho door cu no sa di cua tipo di descuento tabata referi na dje pa por a haci un evaluacion si ta tuma esaki of no. Actualmente por mira mas tipo di descuento for di online shopping, p.e. E-bay, Amazon, Walmart, etc. cu ta conta pa tur persona cu ta haci online shopping cu a pone cu Douana a re-evalua e maneho di acepta un descuento sin specificacion. Awor, ora ta trata di descuentonan cu ta bin di online shopping, Douana lo acepta e descuento sin specificacion:

  • Si e descuento ta conta igual pa tur persona y
  • E factura ta e final di e compra y no un factura caminda cu a kita salestax of cu a kita e descuento, of cambia prijs riba dje.

Loke si ta keda vigente ta cu Douana no ta acepta descuento riba (inland) freight.
Den caso cu ricibi descuento riba (inland) freight mester pone e suma cu lo tin cu wordo paga riba e mesun trayecto.

Brokernan cu ricibi un factura di un importador cu no ta cuadra cu loke a ser splica no mester traha un aangifte manda na Douana exigiendo e factura cu ta conta pa tur persona. Pa kita tur discusion, por manda e comprobante cu a ricibi di e online shopping store ora cu a caba di paga of Douana por exigi e prueba menciona ora cu tin duda.

E maneho anterior cu descuentonan mester ta specifica riba factura, ta keda vigente. Por ehempel, si riba un factura tin un descuento pa haci propaganda pa un producto, Douana no ta acepta esaki.

Pa finalisa, Douana ta trece cambio riba e porcentahe di cashdiscount cu tabata 3%, cu lo bira awor 5%.

E cambio di maneho riba descuento riba productonan di online shopping y e cambio di e cashdiscount pa 5% ta drenta na vigor entrante diamars 13 september 2022.

Meer nieuws