Algun luna atras e concepto di BBO na frontera a wordo anuncia y e intencion pa implementa esaki. Departamento di Aduana a cuminsa inmediatamente cu investigacionnan pa asina trece ahustacion y den e forma aki haci un simplificacion den nos tarifa di impuesto.
Hunto cu Departamento di Impuesto, nos a tene varios session di informacion pa tene tur comerciante, Customs Brokers y importadornan na altura y a haya feedback pa por haci e ahustacionnan necesario. Ayera 6 juli 2023 e ley di BBO na frontera a wordo aproba den parlamento di Aruba y lo bay na vigor 1 augustus 2023. Aduana lo cobra 4% di BBO/BAVP y 3% di BAZV na frontera cu lo wordo calcula for di douanewaarde.

Cu e implementacion aki, Departamento di Aduana kier a informa Customs Brokers y importadornan cu ta haci declaracion, lo siguiente:

• Importadornan cu ta rebende nan producto tin derecho di deduccion di e suma di BBO cu nan a paga na importacion den nan declaracion di BBO na Departamento di Impuesto.
• Pa evita inconveniencia nos ta recomenda pa repasa e persoonsnummer cu e cliente prome cu traha declaracion mirando cu tin cliente ta uza mas cu un persoonsnummer.
• Customs Brokers y importadornan cu ta haci declaracion mester yena e persoonsnummer (di su cliente) corecto prome cu e paga su derechonan na Aduana.
• Si acaso e Customs Broker y importador cu ta haci declaracion yena un persoonsnummer robes y a constata esaki despues di a paga e declaracion, sea prome of despues cu e carga a wordo entrega, mester tuma e pasonan pa haci peticion pa restitucion. Pa haci peticion pa restitucion lo mester pidi un IZM pa traha un declaracion nobo prome cu entrega e peticion pa restitucion.
• Tambe ta crucial pa e douanewaarde ta corectamente calcula den cada declaracion.

Porfabor pa tuma bon nota di e informacion comparti. Pa mas informacion
of pregunta por tuma contacto cu Departamento di Aduana libremente.